ஆப்பிரிக்க நாடான நைஜரின் எல்லைப் பகுதியில் தீவிரவாதிகள் நடத்திய துப்பாக்கிச் சூட்டில் சுமார் 40 பேர் உயிரிழந்துள்ளனர்.
நைஜரின் அண்டை நாடான மாலியில் எல்லைப் பகுதியினை ஒட்டியுள்ள தஹுவா மாகாணத்தில் துப்பாக்கி ஏந்திய மர்ம நபர்கள் சிலர் பொது மக்கள் மீது சரமாரியாக சுட்டு தாக்குதல் நடத்தினர். இந்த தாக்குதலில் சுமார் 40 பேர் உயிரிழந்துள்ளனர். மேலும், பலர் காயமடைந்துள்ளனர். அவர்கள் அனைவரும் மருத்துவமனைகளில் அனுமதிக்கப்படு அவர்களுக்கு தீவிர சிகிச்சை அளிக்கப்பட்டு வருகிறது.
தகவலறிந்து சம்பவ இடத்துக்கு விரைந்த பாதுகாப்பு படையினர் அப்பகுதியில் பதில் தாக்குதல் நடத்தினர். இதையடுத்து, தற்போது அங்கு நிலைமை கட்டுக்குள் கொண்டு வரப்பட்டுள்ளது. இந்த தகவலை மாகாண செய்தித்தொடர்பாளர் அப்துல் ரமான் சகாரியா உறுதிப்படுத்தியுள்ளார்.
இந்த தாக்குதலுக்கு இதுவரை யாரும் பொறுப்பேற்கவில்லை. ஆனால், ஆப்பிரிக்க நாடான நைஜர், அதன் அண்டை நாடான ஸஹேல் ஆகியவற்றில் ஐ.எஸ்.ஐ.எஸ். தீவிரவாதிகளும், அல் கொய்தா அமைப்பும் தீவிரமாக செயல்பட்டு வருகிறது. அந்த அமைப்புகள் அவ்வப்போது தாக்குதல் நடத்துவதால் இந்த அமைப்புகளில் யாரேனும் தாக்குதல் நடத்தியிருக்கலாம் என்று பேசப்பட்டு வருகிறது.
முன்னதாக, திலபெரி மாகாணத்தில் கடந்த ஒரு வாரத்துக்கு முன்பு நடைபெற்ற தாக்குதலில் 58 பேர் பலியானதாக அந்நாட்டு அரசு தெரிவித்திருந்த நிலையில், தற்போது இந்த தாக்குதல் நடைபெற்றுள்ளது என்பது கவனிக்கத்தக்கது.
கடந்த அதிபர் தேர்தலுக்கு பின்னர் நைஜரில் அமைதியிண்மை நிலவி வருகிறது. பிப்ரவரி மாத இறுதியில் முன்னாள் வெளியுறவுத்துறை அமைச்சரான மொகமத் பாஜூம் வெற்றி பெற்றதாக தேர்தல் ஆணையம் அறிவித்தது. ஆனால், முன்னாள் அதிபரும், எதிர்க்கட்சி தலைவருமான மகாமனே ஒஸ்மானே, இதனை மறுத்து வந்ததுடன் தான்தான் வெற்றி பெற்றதாக தெரிவித்து வந்தார். இருப்பினும், மொகமத் பாஜூம் வெற்றியை அந்நாட்டு அரசியல் நீதிமன்றம் உறுதி செய்துள்ளது.kids_news